Tilgangen på nok og rett kompetanse i både næringsliv og kommune er noko som går igjen som ei utfordring, og som eit hinder for vidare vekst i næringslivet. Dette gjer at vi må tenke litt nytt rundt korleis ein får tak i nok arbeidskraft.
I dag fekk rundt 50 frammøtte på frukostmøte på Millennium Cowork høyre fem innlegg, som på kvar sine måtar var knytte til rekruttering og tilgang på kompetanse - om det er ved å rekruttere nye folk, eller ved å heve kompetansen til dei som allereie er tilsette.
Dei som heldt innlegg var Terje Rolén og Elin Dalhaug frå NAV, som snakka om korleis NAV kan hjelpe verksemdene med tilgang på arbeidskraft ved inkluderande rekruttering. Anne-Mari Pilskog og Yvonne Sjåstad Breitveit frå Opplæringskontoret for Søre Sunnmøre snakka om ordninga Fagbrev på jobb, før Eiliv Tore Howlid frå Hareid Ressurssenter fortalde om Kompetansepluss. Der er målet å styrke vaksne sine grunnleggande ferdigheiter gjennom opplæring, slik at dei aktivt kan ta del i arbeids- og samfunnsliv.
Frida Voldnes frå Ulstein næringsforum fortalde om Spring trainee, og korleis eit traineeprogram kan vere med på å rekruttere ny kompetanse til regionen vår. Der er faktisk heile 70 interesserte kandidatar som har registrert seg i ordninga, der mange av dei har kompentanse som arbeidslivet på Søre Sunnmøre treng.
Det siste innlegget var det Trine Hofseth Helgå frå Næringsforeningen Ålesundsregionen som stod for. Ho fortalde meir om Bli med hit-messa som går av stabelen i Oslo den 31. mars, og og dei gode erfaringane frå tidlegare messer.
Gode innlegg og hyggeleg mingling laga ein fin og nyttig start på dagen for dei som tok turen til Millennium Cowork denne morgonen.
På neste frukostmøte får vi besøk av Anniken Vorpenes frå Twoday, som vil snakke meir om Generasjon Z som framtidige kundar og tilsette. Meir informasjon om dette arrangemnetet kjem.
Comments